Tre kërkues të institutit kinez të virologjisë në Vuhan janë sëmurur rëndë nga covid 19 në nëntor 2019, aq sa kanë patur nevojë për kura spitalore. Lajmi është botuar nga Ëall Street Journal, që citon një raport të zbulimit amerikan, të ditëve të fundit të administratës Trump. Shkencëtarët raportohet se u sëmurën në vjeshtën e 2019, me simptoma të ngjashme si me ato të koronavirusit ashtu edhe me ato të sëmundjeve të zakonshme sezonale. Lajmi është përfshirë në një raport të zbulimit amerikan që nuk është publikuar më herët dhe që mund të shtojë tani peshë tek kërkesat në rritje për një hetim më kompleks për faktin se virusi mund të ketë dalë nga një laborator. Shkalla e sëmundjes së kërkuesve, numri i tyre, koha e sëmundjes dhe vizitat e tyre në spital, vijnë në prag të një takimi të organit vendimmarrës të OBSH që duhet të diskutojë fazën e radhës së një hetimi mbi origjinën e koronavirusit. Funksionarët amerikanë në dijeni të raportit kanë shprehur mendime të ndryshme, për elementet e reja, por janë në një mendje për faktin se nuk është dhënë asnjëherë një shkak për sëmundjen e tre kërkuesve kinezë.