Procesi i regjistrimit të votuesve jashtë Kosovës për zgjedhjet e parakohshme për Kuvendin e Kosovës është përmbyllur, pas një periudhe aplikimi që nisi më 6 maj. Sipas të dhënave nga Komisioni Qendror i Zgjedhjeve, gjatë kësaj periudhe janë pranuar mbi 142 mijë kërkesa për regjistrim përmes platformës elektronike, mbi 109 mijë janë aprovuar, ndërsa mbi 25 mijë janë në shqyrtim. Nga shifrat, tregohet se forma me e preferuar e diasporës për të voturar, vazhdon të jetë votimi përmes postës. KQZ bën me dije se mbi 24 mijë qytetarë, janë regjistruar për të votuar fizikisht në përfaqësitë diplomatike. Në përputhje me Ligjin për Zgjedhjet e Përgjithshme, procesi i votimit jashtë vendit do të zhvillohet para ditës së zgjedhjeve në Kosovë. Votimi përmes postës pritet të nisë më 25 maj dhe të zgjasë deri më 6 qershor, ndërsa votimi fizik në ambasada dhe konsullata do të mbahet më 6 qershor.