Gjykata e Posaçme hodhi shortin ku caktoi trupën me tre gjyqtarë që do të shqyrtojnë në themel dosjen në ngarkim të kryebashkiakut të Tiranës, Erion Veliaj dhe personave të tjerë të akuzuar në dosjen e tij. Shorti përcaktoi se kryebashkiaku do të gjykohet nga treshja, Engjëllushe Tahiri, Alma Kodraliu dhe Rudina Palloj. Kryesuese e trupës është zgjedhur gjyqtarja Engjëllushe Tahiri. Më 9 shkurt, Gjykata e Posaçme vendosi të kalojë për gjykim dosjen në ngarkim të kryebashkiakut të Tiranës, Erion Veliaj, bashkëshortes së tij Ajola Xoxa, si edhe 28 personave e shoqërive pjesë e së njëjtës dosje. Më herët, të dyja shkallët e gjykatës së posaçme i kanë refuzuar vazhdimisht kërkesat e Erion Veliajt për masë më të butë sigurie, duke mos marrë parasysh parashtrimet e mbrojtjes së tij në gjykatë. Erion Veliaj u arrestua më 10 shkurt 2025, pasi akuzohet se, së bashku me bashkëshorten, ndërtuan një skemë korrupsioni dhe pastrimi parash për të përfituar në mënyrë të paligjshme nga fondet e bashkisë së kryeqytetit. Ndaj tij, SPAK ka ngritur 5 vepra penale.