Një grup prej tre ekonomistësh amerikanë, përfshirë ish-shefin e Rezervës Federale të SHBA-së, Ben Bernanke, kanë fituar Çmimin Nobel për Ekonomi, për shkak të hulumtimit lidhur me krizat bankare dhe financiare. Akademia Mbretërore Suedeze e Shkencës, tha se Bernanke, Douglas Diamond, dhe Philip Dybvig kanë fituar Nobelin për studimin e tyre që “ndjeshëm përmirësoi kuptimin e rolit të bankave në ekonomi, veçanërisht gjatë krizave financiare”. “Përfundimet e laureatëve kanë përmirësuar aftësinë tonë për të shmangur edhe krizat serioze, dhe paketat e shtrenjta të shpëtimit”, tha Tore Ellingsen, kryetar i Komitetit për Çmimin për Shkenca Ekonomike. Bernanke aktualisht punon në Institutin Bruking në Uashington, Diamond është profesor në Universitetin e Çikagos, ndërkaq Dybvig është profesor në Universitetin e Uashingtonit në Misuri. Çmimi për ekonominë nuk është një prej pesë çmimeve të para që u dhanë më 1895, kur edhe u krijuan cmimet Nobel nga shpikësi i dinamitit, Alfred Nobel. Çmimi Nobel për Ekonomi ka nisur që të ndahet nga viti 1969.