Komisioni i Etikës ka përjashtuar me 10 ditë tetë deputetët e opozitës, që bllokuan ulëset e ministrave dhe të kryetares së Kuvendit si kundërshtim për mosshqyrtimin e kërkesave të tyre në lidhje me përbërjen e komisionit të reformës zgjedhore. Vendimi u dha këtë të premte nga komisioni, që u thirr nga socialistët pas tensioneve të seancës së të enjtes, në fund të së cilës përplasjet kulmuan me bllokimin e foltores dhe ngjitjen në vendet e ministrave dhe të kryetares së Kuvendit. Sipas këtij vendimi, të përjashtuar me dhjetë ditë janë deputetët Elda Hoti, Albana Vokshi, Bledion Nallbati, Zheni Gjergji, Lefter Gështenja, Asllan Dogjani, Luan Baçi dhe Gazment Bardhi. Vendimi do të thotë se tetë deputetët e opozitës nuk do të jenë të pranishëm në seancën e posaçme të së enjtes ku diskutohet rezoluta e përbashkët për Kosovën dhe mocioni me debat i kërkuar nga Gazment Bardhi.