Një panel prestigjoz shkencëtarësh i tha Shtëpisë së Bardhë se hulumtimet tregojnë që koronavirusi mund të përhapet jo vetëm nga tështima ose kollitjet, por edhe vetëm thjesht duke folur, apo dhe më keq, ndoshta edhe vetëm me frymëmarrje. “Ndërsa hulumtimi specifik aktual mbi koronavirusin është i kufizuar, rezultatet e studimeve në dispozicion janë në përputhje me kalimin e tij nga frymëmarrja normale,” sipas letrës së shkruar nga Dr Harvey Fineberg, kryetar i një komiteti në bashkërendim me Akademinë Kombëtare të Shkencave. Fineberg i tha CNN se personalisht, do të nisë të mbajë maskë kur shkon në ndonjë dyqan ushqimor. “Nuk do të mbaj maskë kirurgjikale, se për ato ka nevojë personeli mjekësor,” tha Fineberg, ish dekan i Shkollës së Shëndetit Publik në Harvard. “Por kam një shall të mirë me punim të ngjeshur që do ta përdor. Mundësi ka shumë”, shton ai. Dr Anthony Fauci, anëtar kryesor i grupit të punës të ngritur nga Shtëpia e Bardhë për pandeminë, sqaroi se ideja për të rekomanduar përdorimin e gjerë të maskave në SHBA si mënyrë për të ndaluar përhapjen e koronavirusit, është në diskutim.