Prokuroria e Posaçme po verifikon sinjalizimin e një banke të nivelit të dytë në lidhje me disa transaksione të kryera në llogaritë e ish-ministrit të Brendshëm, Saimir Tahiri. Burime bëjnë me dije se në këtë fazë nuk bëhet fjalë për një hetim të ri ndaj ish-ministrit, por vetëm verifikim. Në bazë të këtij verifikimi do të procedohet më pas nëse do të hapet një hetim i ri, apo jo. Mbledhja e të dhënave ka nisur brenda dhe jashtë vendit. Në bazë të tyre, prokurorët e posaçëm do të vendosin më pas nëse ka element të veprës penale, më konkretisht të pastrimit të parave. Me këtë akuzë, Saimir Tahiri rrezikon deri në 15 vite burgim. Ish-ministri ka pak javë që la qelinë pas dënimit të formës së prerë të shkurtit 2022 ku mori 3 vite e 4 muaj burgim për shpërdorim detyre. Ish-Ministri i Brendshëm u lirua nga burgu pas dy ekspertizave mjeko-ligjore. Në njërën prej ekspertizës thuhej se Tahiri kishte probleme shëndetësore, ndërsa në tjetrën thuhej se bashkëshortja e tij nuk ishte në gjendje të mirë shëndetësore për të siguruar kujdesin e nevojshëm për fëmijët e tyre.