Punonjësit e Kadastrës së Vlorës vijojnë të qëndrojnë në ambientet e zyrave që kanë në këtë qytet, ndërkohë që më datë 31 janar duhet të largohet baza materiale dhe 55 punonjës të transferohen në Tiranë për të vijuar detyrën. Po ashtu, gjatë hyrjes së nëndrejtorit Sokol Shehaj për të takuar punonjësit e tij, këta të fundit e kanë duartrokitur dhe kanë shpërthyer në lot, pasi ka qenë pikërisht ai që ka mbështetur punonjësit e Hipotekës, duke kundërshtuar transferimin e zyrave në Tiranë. Ai është shkarkuar nga puna për shkak se ka qenë në mbështetje të punonjësve dhe ka firmosur peticionin. Punonjësit kërkojnë mbështetje nga përfaqësuesit ligjorë, si deputetë ashtu dhe drejtuesi politik, Bledi Çuçi. Ky i fundit, i pyetur mbrëmjen e së hënës nga gazetarët për këtë transferim, tha se nuk ishte në dijeni të një vendimi të tillë, por pa shtuar nëse do të kundërshtojë apo jo.