Transferimi i kryebashkiakut të Tiranës, Erion Veliaj nga paraburgimi i Durrësit në atë të Fierit është parë me shqetësim nga këshilltarët e majtë. Ata kërkojnë transparencë lidhur me motivet që sollën këtë transferim, teksa ngrenë alarmin për trajtimin çnjerëzor që po i bëhet të zgjedhurit të kryeqytetit. “Shqetësim për transferimin e papritur dhe kushtet e rënda në të cilat raportohet se po mbahet në Fier. Shqetësimi edhe më serioz pas vizitës së Avokatit të Popullit, ku janë ngritur çështje që kërkojnë verifikim e ndërhyrje. Veliaj është i paraburgosur, gëzon prezumimin e pafajësisë dhe të drejtat kushtetuese, të drejtat e njeriut. Asnjë masë paraburgimi nuk duhet të shërbejë si justifikim për trajtim çnjerëzor, kufizime të takimeve me familjarë, mbrojtës, apo marrje të kujdesit shëndetësor. Të kërkojmë nga Ministria e Drejtësisë dhe burgjet arsyet e këtij transferimi, vlerësimin e menjëhershëm të nevojave shëndetësore të zotit Veliaj. Mesa di, ka edhe këmbën në allçi”