Pamjet e publikuara nga ministri izraelit i Sigurisë Kombëtare, Itamar Ben-Gvir, ku shfaqen aktivistët e Global Sumud Flotilla të gjunjëzuar dhe me duart e lidhura, kanë shkaktuar reagime të forta ndërkombëtare. Pas Italisë edhe Franca, Holanda, Belgjika, Spanja dhe Kanadaja kanë thirrur ambasadorët izraelitë për të kërkuar shpjegime lidhur me trajtimin e aktivistëve. Ndërsa kanë dënuar ashpër dhe kanë shprehur indinjatë për mënyrën e trajtimit të të ndaluarve. Nga Holanda, ministri i Jashtëm Tom Berendsen i cilësoi pamjet “tronditëse dhe të papranueshme”, duke theksuar se shkelet dinjiteti njerëzor. Edhe Belgjika reagoi ashpër, ndërsa ministri Maxime Prévot deklaroi se mes të arrestuarve ndodhen edhe shtetas belgë. Ambasadori gjerman në Izrael, Steffen Seibert, e cilësoi trajtimin ndaj të ndaluarve “krejtësisht të papranueshëm”.