Një vrasje që tronditi Kosovën 5 vjet më parë dhe për të cilën ka pasur një gjykim, nuk është mbyllur, sepse, në Deçan Policia ka arrestuar një tjetër person, për shkak të deklaratës kontradiktore të tij në seancat gjyqësore për autorin e krimit. Sipas njoftimit zyrtar është arrestuasr kryeplaku i fshatit Strellc, Haki Pajazitaj. Ndërkohë, vëllai i Donjeta Pajazitajt, Shkëlqimi ka publikuar disa letra anonime që janë dërguar në adresë të tyre, prokurorisë dhe policisë, lidhur me vrasjen e familjares së tyre. Në këto letra shkruhet për arsyen e vrasjes së Donjetës, urdhërdhënësin dhe kryesin e vrasjes. Në një prej këtyre letrave të publikuara, thuhet se një person i quajtur Isni, e ka lënë shtatzënë Donjetën dhe pastaj i ka dhënë 5 mijë euro Naser Pajazitajt që ta vrasë. Sipas dokumentit të publikuar nga vëllau i Donjetës, ai që i ka dërguar letrat është Haki Pajazitaj, kryeplaku i fshatit Strellc, që tashmë ndodhet në burg. Në dëshminë e tij të parë, Haki Pajazitaj ka mohuar të ketë dërguar këto letra. Por, pas sigurimit të pamjeve nga kamerat e pikës postare në Deçan, nga ku janë shpërndarë letrat “anonime”, ai ka deklaruar se ai i ka dërguar vetë këto letra. Letrat tashmë janë bërë pjesë e procesit për rastin e Donjeta Pajazitajt, i cili po zhvillohet në Gjykatën Themelore në Ferizaj. Prokuroria ka bërë ekzaminimin e dorëshkrimit të tyre dhe njëkohësisht ka detyruar Haki Pajazitajn që të shkruajë me qëllim identifikimin e shkrimit mes atij në letrat e dërguara në postë dhe kaligrafisë së tij. Ekspertiza ka konstatuar se nga ekzaminimi i shkrimit në fletën e vendosur në zarf nga dëshmia janë identifikuar karakteristika të përgjithshme dhe individuale që përputhen mes tyre. Karakteristikat që përputhen janë teknika dhe shtrirja e shkrimit, raportet e shkronjave, duke shtuar edhe më shumë dyshimet se ai ka paguar paratë për të vrasë Donjetën, krim për të cilin në atë kohë pati një reagim të ashpër nga opinion vendas.