Aksidenti i shkaktuar nga betonierja kamion në rrethrrotullimin e Saukut pasditen e së mërkurës lë pas disa pikëpyetje, që nuk lidhen më shumë me dinamikën e ngjarjes se sa me procedurat e ndjekura nga autoritetet shqiptare për të parandaluar tragjedi të tilla. Në aksident mbetën të vdekur dy shtetas egjiptianë, që autoritetet thonë se ishin të pajisur në vendin tonë me leje qëndrimi njëvjeçare në vendin tonë dhe vizë të rregullt punësimi pranë kompanisë Alba Beton. Sipas autoriteteve, njëri prej tyre ishte punësuar si drejtues kamioni, tjetri si pompist. Nga të dhënat zyrtare, të dy kanë mbërritur në vendin tonë rreth një muaj më parë. Dyshimet ngrihen mbi procedurat e ndjekura nga autoritetet shqiptare për të verifikuar nëse egjiptiani i punësuar si shofer kishte lejen e drejtimit përkatëse dhe aftësinë për të drejtuar një kamion. Rregulloret në fuqi në vendin tonë mundësojnë konvertimin e patentave të të huajve në patenta të vlefshme për Shqipërinë, por procesi jo detyrimisht kërkon testimin praktik të aplikuesve. Aksidenti i ndodhur te rrethrrotullimi i Saukut që lidh Unazën e Madhe me Autostradën Tiranë-Elbasan thekson nevojën e verifikimeve më të thelluara të aftësive të të huajve që vijnë për punë në Shqipëri, sidomos në sektorë ku rrezikohet jeta e të tjerëve.