Të paktën 35 persona kanë humbur jetën pasi ranë në një pus ndërsa luteshin në një tempull në shtetin qendror të indisë Madhya Pradesh. 14 të tjerë janë shpëtuar ndërsa një person konsiderohet ende i zhdukur në incidentin që ndodhi në qytetin Indore. Policia tha se viktimat po qëndronin mbi një pllakë betoni, të vendosur mbi një pus, kur ajo u shemb për shkak të peshës së tyre. Kryeministri indian, Narendra Modi tha se ai ishte jashtëzakonisht i pikëlluar nga ngjarja. Incidenti ndodhi të enjten gjatë një ceremonie lutjesh organizuar në tempull, me rastin e festivalit hindu Ram Navami. Një turmë e madhe të devotshmit po qëndronin mbi pllakën e betonit që mbulonte pusin, e cila u shemb duke lëshuar dhjetëra njerëz në thuajse 12 metra thellësi. Mediat lokale raportuan se tempulli ishte ndërtuar pasi pusi ishte mbuluar katër dekada më parë. Qeveria ka njoftuar se do të ketë një kompensim prej 500 mijë rupish, ose 6 mijë dollarësh për cdo viktimë dhe 50 mijë rupi për të lënduarit. Kryeministri modi i shprehu ngushëllimet familjeve të viktimave e po ashtu njoftoi edhe një kompensim shtesë prej 200 mijë rupish për ta.