Një tragjedi ka tronditur Shtetet e Bashkuara, ku një 47-vjeçar dyshohet se vrau bashkëshorten dhe gjashtë fëmijët e tij, i vuri flakën banesës dhe më pasa kreu vetëvrasje. Christopher Karolkieëicz, 47 vjeç, bashkëshortja e tij Amanda “Karolkieëicz, 39 vjeçe, si dhe gjashtë fëmijët e çiftit, të moshës nga 5 deri në 15 vjeç, u gjetën të pajetë në shtëpinë e tyre. Sipas autoriteteve, 47-vjeçari dyshohet se qëlloi fillimisht me armë zjarri gruan dhe fëmijët e tij. Më pas, ai besohet se ndezi disa vatra zjarri në pjesë të ndryshme të banesës, përpara se t’i jepte fund jetës duke qëlluar veten. Policia u njoftua nga banorët e zonës, të cilët raportuan se nga shtëpia dilte tym i bardhë. Ekipet e emergjencës punuan për rreth tre orë për të lokalizuar burimin e zjarrit dhe për të hyrë në banesë, ku zbuluan trupat e tetë anëtarëve të familjes. Disa prej viktimave u gjetën në dhomat e gjumit. Autopsitë konfirmuan se të gjithë kishin humbur jetën si pasojë e plagëve të shkaktuara nga armë zjarri dhe jo nga flakët. Edhe kafshët shtëpiake të familjes nuk i mbijetuan zjarrit. Sipas mediave amerikane, Christopher dhe Amanda u njohën në vitin 2008 në kompaninë ku punonin dhe u martuan në gusht të vitit 2009. Ata patën katër fëmijë biologjikë dhe më vonë adoptuan dy vajza. Megjithatë, pas imazhit të një familjeje të lumtur, marrëdhënia e çiftit kishte kaluar vështirësi. Rreth tetë vite më parë, Christopher kishte krijuar një lidhje jashtëmartesore me një praktikante në vendin e punës. Dy vite më parë, Amanda kishte rrëfyer në platformën Reddit problemet në martesën e saj, duke shkruar se bashkëshorti e kishte tradhtuar sërish me një praktikante. Në një nga postimet, ajo tregonte se, pas një periudhe të gjatë vuajtjesh, kishte kuptuar se duhej të mbështetej te vetja për të vazhduar jetën. Autoritetet amerikane vijojnë hetimet për të zbardhur plotësisht rrethanat dhe motivet e kësaj tragjedie familjare.