Nëntë persona, përfshirë një foshnjë, kanë humbur jetën pasi barka në të cilën ndodheshin u përmbys ndërsa përpiqeshin të kalonin Mesdheun, në kushtet e një moti të stuhishëm. 15 persona të tjerë dyshohet se janë zhdukur, tha të enjten roja bregdetare e Italisë. Kjo e fundit tha se kishte marrë një kërkesë për ndihmë nga autoriteti maltez i kërkim-shpëtimit pasi anija u përmbys afërsisht 50 km në juglindje të ishullit Lampedusa të mërkurën. Roja bregdetare tha se dërgoi një anije patrulluese në vendngjarje, e cila "shpëtoi 22 të mbijetuar dhe gjeti 9 individë të vdekur, përfshirë një foshnjë". Operacionet e shpëtimit "ishin veçanërisht sfiduese për shkak të kushteve të pafavorshme të motit dhe detit me dallgë deri në 2.50 metra të larta", tha roja bregdetare. Kombësia e personave që kishin ndërmarrë udhëtimin e rrezikshëm ende nuk është bërë e qartë, por Lampedusa, që ndodhet në Mesdhe midis Tunizisë, Maltës dhe ishullit më të madh italian të Siçilisë, është porti i parë i hyrjes për shumë emigrantë që kërkojnë të arrijnë në Bashkimin Evropian. Një avion i rojes bregdetare italiane po vazhdon kërkimet ajrore për të zhdukurit në zonën ku u mbyt anija. Në një operacion të veçantë, roja bregdetare italiane tha se shpëtoi 37 emigrantë "të cilët ishin në mëshirën e dallgëve në bordin e një varke të vogël prej druri rreth 7 metra të gjatë" në brigjet e Lampedusa të mërkurën.