Një ngjarje e rëndë ka tronditur provincën e Luccas, në Itali, ku një 63-vjeçar ka qëlluar me armë gjahu ndaj bashkëshortes së tij 52-vjeçare dhe djalit 24-vjeçar brenda banesës së familjes. Ishin fqinjët, sipas medioave italiane ata që njoftuan autoritetet, ku menjëherë në vendngjarje kanë mbërritur forca të karabinierëve dhe policisë, të cilat kanë ndaluar autorin e dyshuar. Ndërkohë viktimat pavarësisht ndihmës së parë nuk mundën t’u mbijetonin plagëve të marra nga arma e zjarrit. Sipas raportimeve, ai u vendos në pranga. Banorët e zonës kanë treguar se në familje kishte pasur mosmarrëveshje dhe tensione. Ata u shprehën të tronditur pasi nuk prisnin që të kishte këtë përfundim tragjik. Një grup hetimor ndërkohë mblodhi provat dhe ka nisur hetimet për zbardhjen e motiveve të këtij rasti të rëndë.