Një tjetër autor është ndaluar për trafikun e 50 sirianëve nga Vlora drejt Italisë me gomone. Policia informon se 31-vjeçari Qazim Ismailaj dyshohet se ka strehuar në banesën e tij në fshatin Trevllazër klandestinët që kishin ardhur nga Tirana dhe do iknin për në Itali me rrugë detare. Pak ditë më parë u arrestua pronari i një hoteli në Tiranë, Fatos Dushe i cili kishte strehuar 9 prej klandestinëve. Klandestinët më 8 janar kishin hipur një mjet lundrues i cili u bllokua në mes të detit mes Vlorës e Italisë. Disa prej tyre u dërguan në spital, teksa nuk pati asnjë viktimë dhe të 50-të u evakuuan. Specialistët për Hetimin e Trafiqeve nën drejtimin e Prokurorisë, në vijim të punës për zbardhjen e plotë tentativës për kontrabandimin e migrantëve në rruge detare dhe vënien para drejtësisë të personave përgjegjës, bënë të mundur identifikimin, kapjen dhe ndalimin e autorit të dytë të kësaj ngjarjeje. Vijojnë intensivisht veprimet hetimore, nën drejtimin e Prokurorisë, për identifikimin dhe kapjen e personave të tjerë të implikuar në këtë veprimtari të kundërligjshme.