Në një intervistë për De Standaard, Yve Driesen, drejtori i policisë gjyqësore federale të Antwerpit foli për krimin e organizuar dhe kryesisht për trafikun e kokainës. Ai tha se shifrat për vitin 2024 kundër këtij fenomeni janë pozitive pasi autoritetet po godasin këto linja të trafikut falë dhe bisedave të SKYY ECC apo platformave të tjera të koduara. Ai tha se shumë nga trafikantët qëndrojnë në vendet arabe, por dhe në Shqipëri. “Ne duam të forcojmë pozicionin tonë të informacionit. Shumë nga objektivat tanë me vlerë të lartë qëndrojnë jashtë vendit, për shembull në Emiratet e Bashkuara Arabe, Marok, Turqi ose Shqipëri. Ne gjithashtu kemi nevojë për më shumë sy dhe veshë në ato vende. Kriminelët tanë nuk janë prioritet për autoritetet lokale. Për ne është, kështu që duhet të punojmë vetë për të”, tha ai. Driesen sqaroi gjithashtu dhe trafikun e drogës nga vendet e Amerikës Latine. Ai tha se grupet kriminale tashmë kanë ndryshuar taktikë. “Trafikantët kanë përshtatur teknikat e tyre. Për shembull, ne shohim se relativisht më pak kokainë vjen nga vendet tradicionale të burimit dhe tranzitit si Kolumbia, Ekuadori dhe Brazili, por më shumë përmes Republikës Domenikane, Perusë dhe vendeve të Afrikës Perëndimore. Duket se trafikantët zgjedhin të dërgojnë kokainën e tyre nga vende, anijet e të cilave janë më pak të shënjestruara në portet tona”, sqaroi drejtori I policisë ndërsa theksoi se tashmë trafikantët kanë ulur dhe sasinë e drogës por po tentojën të trafikojnë edhe përmes transportit ajror.