Në shkallën e parë të gjykatës së posaçme nisi rigjykimi ndaj Moisi Habilajt dhe tre personave të tjerë, të akuzuar si pjesë e një grupi të strukturuar kriminal që trafikoi disa kuintalë hashash nga Shqipëria drejt Italisë në vitet 2014-2017. Rigjykimi i çështjes në shkallën e parë rinisi pasi vendimit të prillit të vitit 2023 të gjykatës së apelit, që e ktheu çështjen pasi gjeti shkelje proceduriale gjatë gjykimit në mungesë të Moisi Habilajt, Nezar Seitit, Meridjan Sulajt dhe Fatmir Minajt. Gjykata e e posaçme e shkallës së parë dënoi Moisi Habilajn me 15 vjet heqje lirie, ndërsa nga 13 vite e gjysmë u dhanë për Seitin, Sulajn dhe Minajn. Moisi Habilaj u arrestua në vjeshtën e vitit 2017 nga policia e Katanias në Itali. Ai akuzohej nga pala italiane si koka e një grupi trafikut hashashi drejt Italisë, ku bënin pjesë edhe 30 persona të tjerë. Aksioni i autoriteteve italiane kulmoi pas muajsh të tërë përgjimesh, ku në një bisedë mes Moisi Habilajt dhe Sabaudin Çelajt, përmendet edhe emri i Saimir Tahirit si i afërm i tyre. Tahiri mbante në atë kohë postin e Ministrit të Brendshëm dhe pati akuza politike ndaj tij se kishte lehtësuar trafikun e hashashit për kushërinjtë e tij. Hetimi i italianëve pasoi nisjen e një hetimi parallel në Shqipëri, ku nën akuzë më vonë u mor edhe Saimir Tahiri. Ky i fundit u dënua për shpërdorim detyre me 3 vite burg.