Policia ka goditur brenda pak orësh 2 raste të aktivitetit kriminal në fushën e dhënies ndihmë shtetasve të huaj për kalim të paligjshëm të kufirit. Operacioni u krye nga Seksioni i Hetimit të Trafiqeve në Drejtorinë e policisë së Gjirokastrës, në bashkëpunim me Policinë Kufitare dhe Shërbimet e Frontex, për goditjen e veprimtarisë kriminale në fushën e dhënies ndihmë shtetasve të huaj për kalim të paligjshëm të kufirit, kundrejt fitimit. Kështu, katër persona u kapën duke transportuar emigrantë të paligjshëm, ndërsa një prej të arrestuarve drejtonte mjetin pa patentë. Policia Kufitare dhe shërbimet e FRONTEX-it, në bazë të informacioneve të siguruara në rrugë policore se përgjatë aksit rrugor Kakavijë-Gjirokastër, me dy mjete do të transportoheshin emigrantë të paligjshëm, kanë organizuar punën dhe kanë bërë të mundur lokalizimin e mjeteve dhe arrestimin në flagrancë të 4 personave. Burimet policore thanë se vijon puna për identifikimin dhe kapjen e personave të tjerë të implikuar në këtë veprimtari kriminale.