Xhevdet Xhafa 41-vjeç, është arrestuar nga policia pasi rezultonte i dënuar me burgim sepse kishte trafikuar të motrën e tij. 41 vjeçari , banues në Rrogozhinë është gjetur teksa fshihej në një zonë të pyllëzuar në fshatin Spille. Gjykata e Apelit, Tiranë e ka dënuar me 10 vjet burgim, për veprën penale “Trafikimi i personave të rritur", parashikuar nga neni 110/a i Kodit Penal. Bëhet me dije se ky person ka trafikuar brenda vendit për qëllime fitimi motrën e tij. Pas kapjes, ai pritet të përballet me vuajtjen e dënimit të dhënë nga drejtësia në një nga institucionet e ekzekutimit të vendimeve penale në vend. Ky operacion policor i koduar “Dekada”, u zhvillua nga Komisariati i Policisë Kavajë, në bashkëpunim me Forcën e Posaçme Operacionale të DVP Durrës si rezultat i punës gjurmuese dhe operacionale, për lokalizimin, kapjen dhe vënien në pranga të shtetasve të kërkuar për vepra të ndryshme penale, si dhe në bazë të informacioneve të siguruara nga inteligjenca policore.