Interpol Tirana ka ekstraduar nga Greqia trafikantin e fëmijëve, Mustafa Saliun, i dënuar me 18 vite burg. Saliu akuzohet se ka trafikuar fëmijë përmes dhunës, ndërsa raportohet se ai nuk ka vepruar i vetëm, por përmes një rrjeti trafikantësh, ku bashkëpunonte me persona të tjerë. Sipas autoriteteve, gjatë viteve 2001-2002, Saliu ka trafikuar fëmijë nga Shqipëria drejt Greqisë, ku ata shfrytëzoheshin për lypje në rrugët e Athinës, nën presion dhe kontroll të vazhdueshëm. Në njoftimin zyrtar, bëhet me dije se operacioni u realizua në bashkëpunim me autoritetet greke, me qëllim ekzekutimin e vendimit të Gjykatës së Durrësit. Ndërkohë, autoritetet shqiptare kanë transferuar nga Gjermania edhe shtetasin Florjan Musaj për të vuajtur dënimin në Shqipëri. Ai është dënuar me 8 vite e 10 muaj burg për veprimtari kriminale në fushën e narkotikëve, të kryer në territorin gjerman.