Operacionet e Policisë janë shtrirë përgjatë kufirit të gjelbër me qëllim arrestimin e trafikantëve të klandestinëve. Së fundi, gjatë operacionit të koduar Perimetri, Policia ka arrestuar 5 persona, që kishin organizuar trafikimin e 18 emigrantëve të paligjshëm. Strukturat për Hetimin e Krimeve në Drejtorinë Vendore të Policisë Korçë, në bashkëpunim me Policinë Kufitare kanë goditur edhe dy raste të tjera të veprimtarisë kriminale në fushën e dhënies ndihmë shtetasve të huaj, për kalim të paligjshëm të kufirit, kundrejt fitimit, me qëllim dërgimin drejt vendeve të BE-së. Tre nga 5 të arrestuarit, me banim në Laç u kapën nga shërbimet e Policisë Rrugore në afërsi të fshatit Zëmblak, duke transportuar me tre mjete në drejtim të Tiranës, kundrejt shumës 1000 euro, 15 shtetas të huaj, emigrantë të paligjshëm.