Dy persona janë arrestuar në Elbasan, pasi akuzohen për dhënie ndihmë emigrantëve nga vendet e treta për të kaluar ilegalisht kufirin, kundrejt përfitimit. Në kuadër të fazës ‘Aksi 4’ u arrestua një 23-vjeçar, banues në Shkozet, ndërsa gjatë fazës “Aksi 5” u vu në pranga një 20-vjeçar, banues në Durrës. Sipas Policisë, dy të rinjtë janë kapur duke transportuar në automjete 8 emigrantë nga vendet e treta, të cilët kishin hyrë ilegalisht në territorin shqiptar. Në cilësinë e provës materiale janë sekuestruar edhe dy automjetet që dyshohet se janë përdorur për transportimin e emigrantëve. Hetimet vijojnë për dokumentimin e plotë të aktivitetit kriminal, ndërsa Policia po punon edhe për identifikimin e personave të tjerë që mund të jenë të përfshirë në këtë veprimtari. Materialet procedurale i janë referuar Prokurorisë Elbasan për veprime të mëtejshme.