Perandoria e pasurisë që kishte ngritur me firmën e hedhur te tenderat e AKSHI-t iu shkërmoq Daniel Shimës në harkun kohor të pak muajve, kur u mor i pandehur nga SPAK për abuzimet si nëndrejtor i Agjencisë, teksa vijoi edhe hetimi pasuror. Pikërisht hetimi pasuror i prokurorëve të posaçëm ka zbuluar se Daniel Shima, gjatë dhe pas largimit nga detyra është përpjekur që të fshehë paratë e korrupsionit, duke i kanalizuar ato në një rrjet kompanish të themeluara direkt, ose indirekt prej tij. Hetimet kanë provuar se si Danieli e bëri nënën e tij nga rrobaqepëse në një biznesmene, duke xhiruar miliona euro, blerë troje, apartamente, e marrë leje ndërtimi në Tiranë dhe Pogradec. Miqtë e tij, si Sokol Përllaku dhe Redvin Marku arritën të krijonin dhe administronin disa kompani, sërish me xhiro dhe prona në vlerën e dhjetëra miliona eurove. Sokoli pas bashkëpunimit dhe transaksioneve me Merita Shimën hapi disa kompani të tjera, në fushën e ndërtimit, teksa mori si administrator Redvin Markun. Emri i këtij të fundit është “lidhja” mes Përllakut dhe vetë Danielit, pasi në momentin që Danieli u largua nga AKSHI, hapi një kompani në emrin e tij dhe mori si administrator pikërisht Redvinin!