Një qytezë e vogël në Ajova të Shteteve të Bashkuara të Amerikës është goditur nga një tornado e fuqishme të martën, duke vrarë shumë njerëz dhe duke lënduar dhjetëra të tjerë. Sipas autoriteteve atje, qyteza Greenfield u rrënua, madje edhe spitali i qytezës u shkatrruar, gjë që do të thotë se njerëzit që mbetën të lënduar nga tornado duhej të dërgoheshin në spitalet e qytezave në afërsi për shërim.Sakaq tornado ishte aq e fuqishme, sa rrëzoi edhe disa turbina të mëdha të erës. “Kjo tornado e ka shkatërruar një pjesë të madhe të kësaj qyteze”, tha Alex Dinkla, zëdhënës i policisë në Ajova. Ky i fundit konfirmoi gjithashtu faktin që ka viktima, por nuk dha numrin e saktë të tyre, pasi sipas tij duhej pak kohë për të bërë një bilanc. Guvernatorja e Ajovës, Kim Reynolds, tha se do ta vizitojë Greenfieldin, qytezën me rreth 2 mijë banorë. Më parë Shërbimi Kombëtar i Motit i SHBA-së ka paralajmëruar disa herë për tornado për shumicën e Ajovës dhe për disa shtete në afërsi të saj.