Presidenti ukrainas Volodymyr Zelensky ka bërë të ditur se Uashingtoni po përpiqet të organizojë një takim të ri mes Kievit dhe Moskës, me pjesëmarrjen e Shteteve të Bashkuara, në kuadër të përpjekjeve për t’i dhënë fund luftës. Sipas Zelenskyt, pala amerikane është aktualisht në kontakt me të dyja vendet dhe ka propozuar zhvillimin e një takimi në nivel teknik, si dhe një takim në format trepalësh SHBA-Ukrainë-Rusi, deri në fund të muajit tetor. Presidenti ukrainas deklaroi se Kievi është i gatshëm të marrë pjesë në bisedime dhe se tashmë pret një përgjigje nga Moska. Zelensky bëri me dije se takimi mund të zhvillohet në Emiratet e Bashkuara Arabe, ose në një tjetër vend që mund të propozohet nga pala amerikane. Komentet u bënë gjatë një konference të përbashkët për shtyp në Kiev me kancelarin gjerman Friedrich Merz, në një kohë kur luftimet dhe sulmet ajrore mes Rusisë dhe Ukrainës vijojnë. Megjithatë, ende nuk ka një përgjigje zyrtare nga Moska lidhur me propozimin amerikan. Nëse zhvillohet, takimi do të ishte një tjetër përpjekje për të rikthyer dialogun diplomatik mes palëve dhe për të avancuar negociatat për përfundimin e luftës në Ukrainë.