Dhjetëra banorë të Nivicës, të zonave përreth dhe emigrantë të ardhur nga Greqia, kanë protestuar këtë të diel në Kakome, ku kanë shembur muret rrethuese, godinat e rojeve dhe telat në Gjirin e Kakomesë. Dy ditë më parë u hoq edhe porta në hyrje të gjirit, ndërsa banorët sot protestuan për atë që e quajtën “grabitje të pronave”. “Tokat e të parëve do t’i mbrojmë me gjak”, u shprehën ata gjatë protestës. Banorët kujtuan se beteja ligjore për Kakomenë vazhdon prej vitit 2004, duke u shndërruar në një nga konfliktet më të gjata të pronësisë në jug të vendit. Sipas protestuesve, bëhet fjalë për rreth 29 mijë hektarë tokë, për të cilat proceset administrative dhe ligjore vijojnë prej më shumë se 20 vitesh. Qytetarët paralajmëruan vazhdimin e protestave deri në njohjen e plotë të të drejtave të pronësisë mbi tokat që i konsiderojnë trashëgimi të të parëve.