Një rrëshqitje masive toke në një fjord të Groenlandës shkaktoi një valë që "tronditi Tokën" për nëntë ditë. Sinjali sizmik shtatorin e kaluar u kap nga sensorë në të gjithë botën, duke i shtyrë shkencëtarët të nisin të hetojnë se nga kishte ardhur. Rrëshqitja e dheut, një faqe mali që u shemb dhe mbante akull, shkaktoi një dallgë anormale 200 metra të lartë. Ajo valë më pas u “bllokua” në fjordin e ngushtë, duke lëvizur para dhe mbrapa për nëntë ditë, duke gjeneruar dridhje. Rrëshqitjet e dheut si kjo, thonë shkencëtarët, po ndodhin më shpesh për shkak të ndryshimeve të klimës pasi akullnajat që mbështesin malet e Groenlandës po shkrihen. Rezultatet e hetimit për këtë ngjarje, që janë publikuar në revistën Science, janë rezultat i punës së një ekipi ndërkombëtar shkencëtarësh të ndihmuar nga marina daneze. “Kur kolegët e panë për herë të parë këtë sinjal vitin e kaluar, nuk dukej aspak si një tërmet. Ne e quajtëm atë një "objekt sizmik të paidentifikuar", kujton dr Stephen Hicks, një nga shkencëtarët e përfshirë.