Papa lëshoi një paralajmërim për klimën, pikërisht në këto ditë gjatë të cilave evropa por edhe pjesë të tjera të botës po përvëlohen nën temperatura të larta. "Në pjesë të ndryshme të botës tani shihet qartë se Toka jonë po shkon drejt rrënimit", tha Papa. "Kudo padrejtësia, shkeljet e së drejtës ndërkombëtare dhe të drejtave të popujve, pabarazitë dhe lakmia nga e cila të gjitha këto lindin, prodhojnë shpyllëzim, ndotje, humbje të biodiversitetit. Fenomenet ekstreme të motit, të shkaktuara nga ndryshimet e klimës që vijnë nga dora e njeriut, po rriten në intensitet dhe frekuencë, pa marrë parasysh efektet afatmesme dhe afatgjata të shkatërrimit njerëzor dhe ekologjik të shkaktuar nga konfliktet e armatosura", shtoi ai. Për Papa Leon e XIV, njerëzit nuk po ndërgjegjësohen se shkatërrimi i natyrës nuk i prek të gjithë në të njëjtën mënyrë. Shkelja e drejtësisë dhe paqes, sipas tij, do të thotë goditja e rëndë e më të varfërve, të margjinalizuarve dhe të përjashtuarve. Dhe kjo, sipas atit të shenjtë, nuk është e gjitha: vetë natyra nganjëherë bëhet mjet shkëmbimi, një mall për t’u negociuar për të përfituar avantazhe ekonomike ose politike. Në këto dinamika, tha papa, krijimi shndërrohet në një fushë beteje për kontrollin e burimeve jetësore, cka e kemi parë në zonat bujqësore dhe pyjet që janë bërë të rrezikshme për shkak të minierave, në politikën e ‘tokës së djegur’, konfliktet për burimet e ujit, shpërndarjen e pabarabartë të lëndëve të para, penalizimin e popullatave më të dobëta dhe minimin e vetë stabilitetit shoqëror”.