Top News – Toka në Soledar e mbuluar me kufoma / ’Një çmenduri!’, luftë e ashpër në qytetin ukrainas

Ushtria ukrainase tha se ka kryer sulme ajrore gjatë natës ndaj pozicioneve të paspecifikuara ruse, ndërsa luftimet e ashpra në qytetin e vogël juglindor të Soledarit kanë vazhduar. Në këtë qytet, forcat ruse thuhet se kanë bërë përparime taktike gjatë katër ditëve të fundit. Shtabi i Përgjithshëm i ushtrisë ukrainase po ashtu tha se ushtria ruse po kryen operacione ofensive në drejtim të disa qyteteve në rajonin lindor të Donjeckut, përfshirë në Bahmut, Avdiv dhe Liman, teksa Moska po tenton të përmirësojë edhe pozicionin e saj taktik në drejtim të Kupjanit. Ushtria ukrainase po ashtu tha se ka rrëzuar dy dronë të armikut. Inteligjenca britanike ndërkohë, tha të martën se beson se “aksi në Soledar për Rusinë ka të ngjarë të jetë një përpjekje për të rrethuar” nga veriu qytetin e afërt Bahmut dhe për të prishur linjat e komunikimit të ushtrisë ukrainase.