Toka është më afër shkatërrimit se kurrë më parë, ndërsa Rusia, Kina, SHBA-të dhe vende të tjera bëhen "gjithnjë e më agresive, armiqësore dhe nacionaliste", tha një grup shkencëtarësh bërthamorë që e cuan ‘Orën e Apokalipsit’ në 85 sekonda deri në mesnatë. Anëtarët e Buletinit të Shkencëtarëve Atomikë përmendën rreziqet e luftës bërthamore, ndryshimeve klimatike, keqpërdorimit të mundshëm të bioteknologjisë dhe përdorimit në rritje të inteligjencës artificiale pa kontroll, ndërsa bënë njoftimin vjetor, i cili vlerëson se sa afër është njerëzimi nga fundi. Vitin e kaluar akrepat e orës u vendosën 89 sekonda para mesnate. Që atëherë, “mirëkuptimet globale të fituara me vështirësi po shemben, duke përshpejtuar një konkurrencë të fuqive të mëdha sipas parimit “fituesi i merr të gjitha” dhe duke minuar bashkëpunimin ndërkombëtar” të nevojshëm për të zvogëluar rreziqet ekzistenciale, tha grupi. Shkencëtarët shqetësohen për kërcënimin e përshkallëzimit të konflikteve që përfshijnë vendet e armatosura me armë bërthamore, duke përmendur luftën Rusi-Ukrainë, konfliktin e majit mes Indisë dhe Pakistanit dhe nëse Irani është i aftë të zhvillojë armë bërthamore pas sulmeve verën e kaluar nga SHBA dhe Izraeli.