Një tjetër aksident me pasojë vdekjen ka ndodhur në Shëngjin këtë të shtunë. Ngjarja ka ndodhur pak pas mesditës, në zonë e Kunës, ku viktimë ka mbetur 50-vjeçari, Preng Gjoni. Viktima ishte duke punuar në kantierin e hapur të një pallati në këtë zonë, kur një dërrasë që dyshohet se është shkëputur nga lartësia e ka goditur atë në kokë. 50-vjeçari është transportuar nga persona të tjerë për në Spitalin e Lezhës, ku ka ndërruar jetë. Ndërkohë, personat që e shoqëruan për në spital janë larguar menjëherë nga vendi i ngjarjes. Policia identifikoi vendngjarjen, pranë një objekti trekatësh. Në kantier u gjetën punonjës të tjerë, të cilët u shoqëruan për t’u marrë në pyetje. Ky është aksidenti i dytë me vdekje në Shëngjin brenda tre ditëve. Të enjten gjeti vdekjen 28-vjeçari Emiljano Frroku. Ai ra nga kati i nëntë i një pallati në ndërtim, pasi iu shkëput vinçi që po montonte. Nga hetimet e kryera, rezultoi se viktima punonte në të zezë, ndërsa dy katet e fundit të pallatit ishin pa leje.