Pas Kalludrës dhe Jabukës është gjetur një tjetër zonë, ku dyshohen se ndodhen mbetje mortore që i përkasin periudhën së luftës serbe në Kosovë. Prokuroria Speciale e Republikës së Kosovës ka njoftuar se po vijojnë intensivisht hetimet për rastin e dyshuar të krimeve të luftës në komunën e Zubin Potokut, në koordinim me Policinë e Kosovës. Sipas autoriteteve, deri më tani janë arrestuar tre persona, të dyshuar për veprën penale “Krime lufte kundër popullsisë civile”, ndërsa gjatë veprimeve hetimore janë ushtruar kontrolle në disa lokacione. Një nga zhvillimet më të rëndësishme është zbulimi i mbetjeve mortore në fshatin Jabukë. Prokuroria bën të ditur se ato do t’i nënshtrohen ekzaminimeve mjeko-ligjore dhe analizave të ADN-së për të mundësuar identifikimin e tyre. Ndërkohë, gërmimet në fshatin Kalludër e Vogël vazhdojnë, ndërsa hetimet janë shtrirë edhe në një lokacion të tretë. Në terren ndodhej edhe prokurorja e çështjes, së bashku me hetuesit e Drejtorisë për Hetimin e Krimeve të Luftës dhe ekspertët forenzikë, të cilët po mbikëqyrin veprimet hetimore. Për shkak të fazës së ndjeshme të procedurës, Prokuroria Speciale ka bërë të ditur se nuk mund të japë më shumë detaje në këtë moment, duke theksuar se informacionet e reja do të publikohen sapo të jetë e mundur pa cenuar ecurinë e hetimit.