Presidenti amerikan Trump dhe ai rus Vladimir Putin kanë rënë dakord të takohen në ditët në vijim për të diskutuar përfundimin e luftës. Dhe lajmi për takimin e mundshëm vjen ndërsa Putini intensifikoi fushatën e tij të luftës në Ukrainë me një tjetër natë sulmesh. Pamje shqetësuese tregojnë forcat e Kremlinit duke goditur një urë kyçe në Kherson, të cilën nuk arriti ta dëmtojë në gjashtë sulme masive ajrore. Kanalet ruse në telegram shkruajnë se grupet e sabotimit do të punojnë për rënien e qytetit kryesor. Në disa video shihen dronët shahed që godasin rajonin lindor të Dnipropetrovskut, në Ukrainë, ku katër persona u plagosën, përfshirë një grua 69-vjeçare. Sulmet ruse vranë gjithashtu të paktën tre persona në Nikopol. Viktima u regjistruan edhe në Zaporizhia. Dhe ky tërbim vjen mes raportimeve për një samit të planifikuar mes Trumpit dhe Putinit për të diskutuar përfundimin e luftës. Trump diskutoi për takimin me presidentin rus, një ditë më parë, gjatë një telefonate me Zelenskin dhe udhëheqës të tjerë evropianë, raporton Neë York Times. Kryeministri britanik Keir Starmer, kancelari gjerman Friedrich Merz dhe shefi i NATO-s Mark Rutte ishin midis liderëve që u bashkuan në telefonatë. Si Putin ashtu edhe Zelensky ende nuk kanë dhënë një përgjigje në lidhje me takimin që mund të shënojë fillimin e fundit të pushtimit të Ukrainës.