Në harkun e 24 orëve presidenti Meta nuk ka dekretuar dy ligje, duke i rikthyer në Kuvend për rishqyrtim. Një ditë më parë ktheu ligjin për Gjendjen Civile, ndërsa këtë të hënë nuk ka hedhur firmën e dekretimit e ligjit për metrologjinë. Sipas argumenteve të presidentit Meta, ky është është një ndër ligjet me përmbajtje më të lartë antikushtetutshmërie, në shkelje flagrante të parimeve themelore kushtetuese të funksionimit të tregut të lirë dhe konkurrues, duke përbërë dhe shembullin tipik dhe të përsëritur, tëfenomenit të “korrupsionit legjislativ”. Ky ligj, sipas arsyetimeve të kreut të shtetit në disa dispozita të tij krijon hapësira për zhvillimin e praktikave korruptive dhe shtron terrenin që këto praktika në dëm të interesit të popullatës dhe interesit publik, të realizohen drejtpërdrejtë përmes ligjit dhe mbrojtjes që ai ofron për subjektet që do t`i realizojnë ato.