Një grup deputetësh të Partisë Demokratike kanë depozituar në Kuvend kërkesën për interpelancë urgjente me Ministren e Shëndetësisë dhe Mirëqënies Sociale, duke ngritur shqetësime për gjendjen reale të sistemit shëndetësor publik. Në fokus të interpelancës është infrastruktura digjiitale, sipas deputetëve, primitive me mungesa të kartelës elektronike mjekësore dhe sistemit PACS, mungesa e shërbimeve të specializuara kardiake, si dhe mungesa periodike e barnave jetësore të emergjencës. Nismëtari i interpelancës, deputeti Kliti Hoti ka denoncuar centralizimin ekstrem që detyron pacientët kronikë nga 11 qarqet e tjera të vendit të udhëtojnë në drejtim të Tiranës për të marrë receta dhe autorizime rutinore, që nuk ofrohen nga spitalet rajonale. Kjo është kërkesa e radhës për interpelancë me ministren Evis Sala, që ka qenë në qendër të kërkesave të opozitës për kushtet në të cilat ndodhen sot spitalet e vendit.