Pas publikimit të rezultateve në njësinë 10, ku rezultoi se PS mori 6007 vota, ndjekur nga koalicioni PD-AN me 4550 vota, si dhe LSI me 628 vota, ka reaguar kandidatja demokrate Jorida Tabaku. Ndërsa shifrat në njësinë 10 janë dukshëm në favor të socialistëve, Tabaku çuditërisht e lexon ndryshe rezultatin. Në deklaratën e saj Jorida Tabaku thotë se në këtë njësi PD ka rritje me 1200 vota krahasuar me 4 vite më parë, ndërsa PS ka humbur 200 vota. Ndonëse trendi i numërimit të votave në shkallë kombëtare është dukshëm në favor të PS, Tabaku nga selia e PD deklaron se Tirana po i prin ndryshimit të madh. Në fakt në njësinë 10, ajo që bie më shumë në sy ishte numri i votave që kishte marrë kryetari i PD Lulzim Basha si kandidat ku ka marrë 592 vota, ndërsa kandidati i ps fatmir Xhafaj ka marrë 2795 vota, disa herë më shumë nga lideri I demokratëve dhe kjo bën diferencën e dukshme të votimit në këtë njësi. “Tirana në fakt po i prin ndryshimit. Rezultatet që erdhën nga dega 10 në Tiranë me votimin elektronik janë të jashtëzakonshme. Partia Demokratike është rritur me 30%, ka një rritje me 1200 vota ndërkohë që Partia Socialiste ka rënë me 200 vota. Unë ftoj të gjithë numëruesit, të gjithë vëzhguesit të vazhdojnë të numërojnë me vendosmëri. Rezultatet në çdo kuti votimi tregojnë pikërisht këtë trend, Tirana po i prin ndryshimit, Tirana do të vazhdojë të ketë një ditë me diell si ajo e djeshmja dhe unë i ftoj që të gjithë që të vazhdojmë të numërojmë, të vazhdojmë të ndryshojmë sepse e ardhmja për Tiranën do të jetë më e mirë. Shqipëria po fiton, Shqipëria po fiton”