Pronari kinez i TikTok-ut, ByteDance, njoftoi se ka finalizuar një marrëveshje për krijimin e një ndërmarrjeje të përbashkët në pronësi amerikane, e cila do t’i ruajë të dhënat në SHBA, me qëllim që ta shmangë mbylljen e aplikacionit të videove të shkurtra në Shtetet e Bashkuara. TikTok-u i ka mbi 200 milionë përdorues amerikanë. Kjo marrëveshje përbën moment kyç për kompaninë e rrjeteve sociale, pas përplasjeve disavjeçare që nisën në gusht të vitit 2020, kur presidenti amerikan Donald Trump u përpoq ta mbyllte aplikacionin për shkak të shqetësimeve për sigurinë kombëtare. Më pas, Trump vendosi të mos e zbatojë një ligj të miratuar në prill 2024, i cili kërkonte që ByteDance t’i shiste asetet e veta në SHBA deri në janarin pasues ose të përballej me mbyllje. Kjo masë u mbështet edhe nga Gjykata e Supreme. ByteDance theksoi se sipërmarrja e re do t’i ruajë të dhënat e përdoruesve amerikanë, aplikacionet dhe algoritmet përmes masave të privatësisë së të dhënave dhe sigurisë kibernetike. Kompania dha pak hollësi lidhur me procesin e shkëputjes së pronësisë. Trump e vlerësoi marrëveshjen në një postim në rrjetet sociale, duke thënë se TikTok-u “tani do të jetë në pronësi të një grupi patriotësh dhe investitorësh të mëdhenj amerikanë, më të mëdhenjtë në botë”. Ai falënderoi presidentin e Kinës, Xi Jinping, “për bashkëpunimin dhe miratimin e marrëveshjes. Ai mund të kishte vepruar ndryshe, por nuk e bëri, dhe ai çmohet për vendimin e tij”, shkroi trump. Sipas marrëveshjes, investitorët amerikanë dhe ndërkombëtarë do të zotërojnë 80.1 për qind të sipërmarrjes, ndërsa ByteDance do të mbajë 19.9 për qind të aksioneve. Tre investitorët menaxhues të TikTok-ut të ri, gjiganti i informatikës Oracle, grupi i kapitalit privat Silver Lake dhe firma investuese MGX me seli në Abu Dhabi, do të zotërojnë secili nga 15 për qind.