Kompania TIBO doli me një deklaratë ku mohonte lajmin se gjykata e Tiranës ka vendosur masën e sekuestrimit preventiv ndaj saj. Megjithatë, dokumentet e publikuara nga Top Channel këtë të shtunë provojnë të kundërtën. Sipas vendimit të gjykatës, TIBO ka mashtruar me 2.2 milionë euro shtetasen Mirlinda Heidorn. Kjo e fundit ka kallëzuar Adnan Mahmutajn, aksioner me 32 për qind të aksioneve në kompaninë TIBO. Sipas dosjes që disponon Top Channel, Mahmutaj i ka thënë kallëzueses Mirlinda Heidorn se i duhet një shumë prej 2.2 milionë eurosh për vijimin e kontratës që kishte me shtetin italian, shumë të cilën kallëzuesja e ka kredituar. Përfitues i drejtpërdrejtë i shumës 2.2 milionë euro është “Megaëare Shpk” dhe garantorë janë “Tibo Comunication shpk” dhe “Tibo Al” shpk, duke parashikuar në kontratë një komision mujor prej 25.000 euro. Kallëzuesja shpjegon se është takuar me Mirgen Zeçallari, aksioner në kompanitë e lidhura, i cili e ka siguruar se nuk do t’i marrë paratë e kredituara, pasi Tibo është në pamundësi. Mahmutaj akuzohet se pasi ka marrë 2.2 mln eurot nga shtetësja Mirlinda Heidorn ka tjetërsuar kuotat e kompanive garantore. Hetimi rezulton se ka nisur fillimisht nga Krimi Ekonomik Tiranë për t’u ndjekur më pas nga Prokuroria e kryeqytetit. Top Channel ka raportuar vazhdimisht se kompania TIBO, pa pasur asnjë të drejtë shpërndarjeje përmes platformës së saj IPTV ka piratuar duke transmetuar Top Channel dhe TV Klan në të gjithë botën. TIBO po ashtu u shiste shqiptarëve sikur të kishte të vetën edhe kampionatet, La Liga, Premier Ligue, BundesLiga dhe Copa Italia, ndërkohë që këto kampionate janë të blera me të drejta transmetimi vetëm nga DigitAlb. Operatori, pa asnjë lloj të drejte dhe në shkelje të plotë të ligjeve dhe rregullave ndërkombëtare transmetonte ngjarjet sportive të blera për dhjetëra miliona euro nga Digitalb.