Sekretari amerikan i Thesarit Scott Bessent, dhe kryenegociatori tregtar Jamieson Greer do të takohen me shefin ekonomik të Kinës, He Lifeng, në Zvicër këtë fundjavë për bisedime që mund të jenë hapi i parë drejt zgjidhjes së një lufte tregtare që po trondit ekonominë globale. Lajmi për takimin e planifikuar të Gjenevës, i njoftuar fillimisht nga Uashingtoni të martën vonë, ndikoi menjëherë në bursa duke i rritur ato. Bisedimet vijnë pas javësh tensione që kanë parë që tarifat mbi importet e mallrave midis dy ekonomive më të mëdha në botë të kalojnë shumë përtej 100%, duke arritur në atë që Bessent të martën e përshkroi si ekuivalentin e një embargoje tregtare. Bllokimi, së bashku me vendimin e Presidentit të SHBA-së, Donald Trump, muajin e kaluar për të vendosur tarifa gjithëpërfshirëse mbi dhjetëra vende të tjera, ka përmbysur zinxhirët e furnizimit, ka trazuar tregjet financiare dhe ka ushqyer frikën e një rënieje të ndjeshme të rritjes globale. Ekipet negociuese që mblidhen në Zvicër, e njohur për neutralitetin e saj, pritet të diskutojnë uljet e tarifave, thanë dy burime të njohura me planin.