Dy pika karburanti, një në Tiranë dhe tjetra në Vlorë janë gjobitur nga Inspektoriati Shtetëror i Mbikëqyrjes së Tregut, pasi tregëtonin naftën dhe benzinë me çmimin më të lartë se çmimi tavan i vendosur nga Bordi i Administrimit të Hidrokarbureve. Ky i fundit vendosi se për periudhën 16 deri më 21 Mars, çmimi tavan i tregëtimit me pakicë të naftës të jetë 203 lekë për litër, ndërsa ai i benzis 206 lekë për litër. Duke nisur nga java e ardhshme do të hyjë në fuqi sekuestrimi i çdo pike karburanti që ngre çmimin e shpallur paraprakisht nga Bordi i Administrimit. Në lidhje me gjobitjen ndaj dy pikave të karburantit ka reaguar dhe kryeministri Edi Rama. Përmes një postimi në rrjetet sociale, kreu i qeverisë paralajmëron pikat e karburanteve se çdo ngritje për fitim në kurriz të popullit do të ndëshkohet siç e kërkon kjo gjendje lufte në tregjet ndërkombëtare. Inspektoriati Shtetëror i Mbikëqyrjes së Tregut është çdo ditë në terren për të kontrolluar çmimet e tregtimit me pakicë të hidrokarbureve.Bordi i Administrimit të Hidrokarbureve u ngrit nga Qeveria pas protestës së qztetarëve kundër rritjes së çmimit të naftës.