Guvernatori i rajonit të Astrakhanit në Rusi, u ka bërë thirrje njerëzve që të mos përfshihen nga paniku pasi qyteti kryesor i rajonit, afër një kompleksi të madh kimik që u sulmua nga dronët ukrainas këtë javë, u mbulua nga një re gazi natyror. Guvernatori Igor Babushkin këmbënguli se gazi që njerëzit mund të nuhasin ishte rezultat i punës për rifillimin e prodhimit në fabrikën pranë qytetit jugor të Astrakhanit, i cili ka një popullsi prej rreth 475,000 personash. “Të nderuar qytetarë, sot në mëngjes qyteti është mbuluar nga një re gazi natyror, i cili ka një erë specifike që shfaqet pas përpunimit”, ka shkruar ai në Telegram. "Specialistët po kryejnë punët e restaurimit dhe kanë filluar prodhimin këtë mëngjes". Ai nuk e bëri të qartë se cfarë prodhimi po rifillonte. Babushkin tha se disa zjarre ishin shuar kur uzina u mbyll pas sulmit dhe rifillimi i punës kërkonte një lëshim gazi që më pas "ndizej, si në një sobë me gaz nga ato që përdoren në shtëpi". Ai tha se shërbimi i motit parashikonte se reja e gazit do të largohej nga qyteti. “Gazi natyror nuk është i rrezikshëm për shëndetin në hapësirat e hapura dhe shumë shpejt gjendja e ajrit do normalizohet”, tha ai.