Policia e Kosovës ka nisur hetimet pasi në Mitrovicën e Veriut, persona ende të panjohur, kanë shpërndarë fletushka në të cilat bëhej “thirrje për rezistencë” dhe “nxitje të urrejtjes”. Në buletinin e radhës të saj, policia e Kosovës tha se fletushkat u shpërndanë në hyrje të ndërtesave dhe në rrugët e qytetit. Zëvendësdrejtori i policisë për rajonin e veriut, Veton Elshani, tha për Radion Evropa e Lirë se dyshohet se këto fletushka janë shpërndarë ditën e hënë dhe pas protestës së zhvilluar atje. “Nuk ka të dyshuar dhe as të arrestuar për momentin”, tha Elshani. Fletushkat, që janë nënshkruar nga "Mbrojtja Kombëtare" dhe janë shpërndarë në kanale të ndryshme në Telegram. Ato përmbajnë udhëzime të supozuara për rezistencë ndaj policisë së Kosovës. Ndër të tjera, në këto fletushka, thuhet se policia e Kosovës duhet të qëllohet me ndonjë mjet si edhe të pështyhen dhe ofendohen pjesëtarët e saj. Po ahstu në fletushka kërkohet që të vandalizohen makinat e policisë, me mjete të forta e më pas jepen edhe udhëzime se si të përgatiten koktejlet e molotovit apo mjete të ngjashme shpërthyese. Lista Serbe, partia kryesore e serbëve në Kosovë që gëzon mbështetjen e Beogradit zyrtar, u bëri thirrje qytetarëve në veri që “të mos bien pre e provokimeve të tilla”. Sipas kësaj partie, kushdo që i ka bërë këto veprime, ka pasur për synim të minojë paqen dhe të thellojë paqëndrueshmërinë “në mënyrë që serbët të fajësohen për incidente të reja të mundshme”. Një ditë më parë, në mitrovicën e veriut, serbët protestuan kundër vendimit të autoriteteve të kosovës për ndalimin e përdorimit të dinarit serb, për pagesa. Në veriun e kosovës ndërkohë, ditë më parë janë shfaqur edhe disa grafite me mesazhet “Kur të kthehet ushtria në Kosovë, Brigada e Veriut jeton”. Brigada e Veriut, së bashku me Mbrojtjen Civile janë organizata që Qeveria e Kosovës i ka shpallur organizata terroriste vitin e kaluar. Besohet se ato veprojnë në veri të Kosovës dhe numërojnë qindra anëtarë nga radhët e komunitetit serb.