Bilanci i dy tërmeteve shkatërrues që goditën Venezuelën është rënduar ndjeshëm. Sipas autoriteteve dhe Kombeve të Bashkuara, mbi 1500 persona kanë humbur jetën, ndërsa mbi 50 mijë të tjerë rezultojnë ende të zhdukur. Zona më e goditur është La Guaira, pranë kryeqytetit Karakas, ku lagje të tëra janë kthyer në gërmadha. OKB tha se operacioni i kërkim-shpëtimit është "jashtëzakonisht kompleks" dhe paralajmëroi se numri i viktimave pritet të rritet edhe më tej. Pasgoditjet dhe ndërtesat e dëmtuara vazhdojnë të rrezikojnë ekipet e emergjencës. Në shumë zona, familjarët dhe vullnetarët po gërmojnë me duar për të gjetur të mbijetuar, duke denoncuar mungesën e makinerive të rënda dhe ndihmës shtetërore. Vizita e presidentes së përkohshme Delcy Rodríguez në një nga zonat e prekura u shoqërua me protesta dhe thirrje zemërimi nga banorët, të cilët akuzuan qeverinë për mungesë reagimi. Ndërkohë, në operacionet e kërkim-shpëtimit janë angazhuar ekipe nga të paktën 17 shtete, përfshirë Spanjën, Kilin, Meksikën, Kolumbinë, Zvicrën dhe Salvadorin. Shtetet e Bashkuara kanë dërguar mbi 250 specialistë, ekipe kërkim shpëtimi, pajisje të specializuara dhe ndihma humanitare. Sipas autoriteteve, mes viktimave janë edhe 28 shtetas portugezë, pesë spanjollë, shtatë kinezë, dy brazilianë, një kilian dhe një italian.