Një murale që tregon Mojtaba Khamenein së bashku me komandantët dhe zyrtarët e vrarë iranianë është bërë virale në Iran, duke nxitur spekulime se ajatollahu i ri i vendit mund të jetë i vdekur ose i plagosur rëndë gati dy muaj pasi u pa për herë të fundit në publik. Muralja e titulluar "Martirët e Luftës Epike", përshkruan udhëheqës të lartë ushtarakë dhe politikanë iranianë të vdekur, përfshirë Qassem Soleimanin, ish-Presidentin Ebrahim Raisi dhe themeluesin e Republikës Islamike Ruhollah Khomeini. Pamjet e murales u përhapën me shpejtësi në mediat sociale, duke shkaktuar shumë pikëpyetje mbi fatin e udhëheqësit të ri suprem dhe djalit të të ndjerit Ajatollahut Ali Khamenei, i cili u vra në sulmet e para amerikane-izraelite në Teheran më 28 shkurt. Ky nuk ishte i vetmi gabim nga regjimi i Teheranit në ditët e fundit. Agjencia e Lajmeve Tasnim, e lidhur me Trupat e Gardës Revolucionare Islamike, iu referua Khameneit në një postim të kohëve të fundit si "udhëheqësi martir i revolucionit". Zyrtarët e Republikës Islamike më vonë thanë se ky ishte një gabim. Mojtaba Khamenei nuk është shfaqur në asnjë video ose regjistrim audio që kur sulmet goditën rezidencën e babait të tij në fillim të luftës. Disa deklarata të tij të transmetuara në televizionin shtetëror, janë lexuar nga folësit. Media ndërkombëtare që citojnë zyrtarë iranianë kanë raportuar se Mojtaba Khamenei pësoi lëndime serioze në sulmin e 28 shkurtit, por mbeti mendërisht i kthjellët dhe i përfshirë në vendimmarrje. Raportet thonë se ai i ishte nënshtruar disa operacioneve në këmbë dhe krahë dhe kishte vështirësi të fliste për shkak të djegieve të rënda në fytyrë dhe buzë. Raporte të tjera pretendojnë se ai iu nënshtrua edhe një operacioni plastik për lëndimet e tij dhe se Presidenti iranian Masoud Pezeshkian, edhe vetë një mjek, ishte përgjegjës për shërimin e tij.