Ish-presidenti I Kosovës, Hashim Thaçi është përballur këtë të premte sërish me togat e zeza në Dhomat e Specializuara të Kosovës në Hagë, nën akuzën e pengimit të drejtësisë. Përveç tij, aktakuza e njëjtë është ngritur edhe ndaj Bashkim Smakajt, Isni Kilajt, Fadil Fazliut dhe Hajredin Kuçit. Prokuroria publikoi një audio-incizim që pretendoi se është nga takimi i 6 tetorit në qendrën e paraburgimit në Hagë mes Thaçit, Kilajt dhe Vllaznim Kryeziut. Sipas ZPS-së, Thaçi aty jep udhëzime për Kilajn dhe Kryeziun e si dëshmitari 4 të ndryshonte pjesë të dëshmisë. Prokurori Joshua Hafetz tha gjatë seancës se ka dëshmi të shumta kundër Thaçit dhe të akuzuarve, përfshirë nëntë audio-incizime në qendrën e paraburgimit në Hagë, thirrje telefonike, urdhra të gjykatës që pretendohet se janë shkelur dhe ekspertizë që dëshmojnë se dokumentet që u gjetën në Kosovë ishin printuar nga printeri që përdorte Thaçi në Hagë. Nga ZPS-ja thanë se Thaçi udhëhoqi tri grupe të ndryshme, në përpjekjet e tij për të ndikuar te dëshmitarët. Prokurorët përmendën se për veprat e pengimit të personave zyrtarë, dënimi sipas ligjeve të Kosovës parashikohet është 1 deri në 5 vjet burgim.