Rusia është përballur me muajin më të rëndë në tetor përsa i përket viktimave në fushëbetejë që kur nisi lufta në Ukrainë, tha të dielën shefi i Shtabit të Mbrojtjes i Britanisë së Madhe, Tony Radakin. Forcat ruse regjistrauan mesatarisht rreth 1.500 të vrarë apo plagosur brenda një dite në Ukrainë gjatë muajit tetor, sipas Radakin. Rusia nuk e zbulon numrin e të vrarëve në radhët e veta në luftën në Ukrainë, por zyrtarët evropianë të Mbrojtjes kanë thënë se numri i përgjithshëm i viktimave në tetor është më i madhi deri më sot. Radakin tha për BBC se populli rus po “paguan një çmim shumë të shtrenjtë” për pushtimin e Ukrainës që presidenti Vladimir Putin, e nisi në shkurt 2022. “Numri i të vrarëve apo plagosur është gati të arrijë në 700.000 për Rusinë. Kjo është dhimbja dhe vuajtja e madhe që kombi rus duhet ta durojë për shkak të ambicieve të Putinit”, tha ai. Ai tha se, ndërsa Rusia po shënon përparime dhe po e vë nën trysni Ukrainën, humbjet po i pëson “për kapjen e pjesëve të vogla të territorit”. Kostoja e luftës, e cila sipas Radakin është mbi 40 për qind e shpenzimeve publike në mbrojtje dhe siguri, është gjithashtu duke “shteruar” rezervat e Rusisë. Radakin tha se aleatët perëndimorë do t’i qëndrojnë pranë Ukrainës “sa të jetë e nevojshme”, pavarësisht dyshimeve që kanë lindur për mbështetjen amerikane pasi Donald Trumpi fitoi zgjedhjet presidenciale në fillim të javës.