Koreja e Veriut ka lëshuar një raketë të re balistike ndërkontinentale të enjten, duke e kryer testimin e parë pas gati një viti të një arme të dizajnuar për t’i kërcënuar Shtetet e Bashkuara. Testimi ndodhi vetëm disa ditë para zgjedhjeve presidenciale të nëntorit në SHBA. Lideri i Koresë së Veriut, Kim Jong Un, urdhëroi testimin e raketës dhe ishte i pranishëm në vendin e ngjarjes. Ai e quajti testimin “veprim i duhur ushtarak” për t2 dëshmuar vendosmërinë e Koresë së Veriut për t’iu përgjigjur armiqve që kanë kërcënuar sigurinë e Veriut, tha Ministria Mbrojtjes e këtij vendi në një komunikatë. Shtetet e Bashkuara, Koreja e Jugut dhe Japonia e identifikuan raketën si ICBM dhe e dënuan lëshimin e saj, duke thënë se rrit tensionet. Koreja e Veriut e konfirmoi testimin e raketës pak orë pasi fqinjët e saj e konfirmuan lëshimin e saj, duke thënë se ajo është një raketë e re, më e shpejtë, që mund të godasë SHBA-në. “Koreja e veriut nuk do ta ndryshojë kurrë qëndrimin e saj për përforcimin e forcave bërthamore”, tha Kim Jong un. Shefat e Shtabit të Përbashkët të Koresë së Jugut thanë se Koreja e Veriut mund të ketë testuar një raketë të re balistike me rreze të gjatë veprimi, me lëndë të ngurtë djegëse. Raketat me karburant të ngurtë janë më të lehta për t’u zhvendosur dhe për t’u fshehur dhe mund të lëshohen më shpejt se ato me karburant të lëngët. Zëdhënësi i shtabit, tha se lëshimi mund të jetë bërë për t’i dhënë Koresë së Veriut një pozicion më të fortë në negociatat e ardhshme dhe se është planifikuar në kohë për zgjedhjet amerikane. Ministri i Mbrojtjes i Japonisë, u tha gazetarëve se kohëzgjatja e fluturimit të raketës prej 86 minutash dhe lartësia maksimale prej më shumë se 7.000 kilometrash i tejkaluan të dhënat e testeve të mëparshme të raketave të Koresë së Veriut. Zëdhënësi i Këshillit të Sigurisë Kombëtare të SHBA-së, Sean Savett, e cilësoi lëshimin e raketës si "shkelje flagrante" të shumë rezolutave të Këshillit të Sigurimit të OKB-së, dhe tha se ajo "rrit tensionet pa nevojë dhe rrezikon destabilizimin e sigurisë në rajon". Ai tha se SHBA-ja do t’i marrë të gjitha masat e nevojshme për të garantuar sigurinë e territorit amerikan dhe të aleatëve të saj, Koresë së Jugut dhe Japonisë.