Koreja e Veriut ka mundësi të bëjë provokime të mëdha, si psh një testim bërthamor apo lëshimin e një rakete me rreze të gjatë veprimi, përpara zgjedhjeve në SHBA, thotë presidenti i Koresë së Jugut. Presidenti Yoon Suk Yeol tha të shtunën se zbulimi kohët e fundit, i një objekti bërthamor nga Koreja e Veriut, ka shumë të ngjarë të jetë një përpjekje për të tërhequr vëmendjen e Uashingtonit në prag të zgjedhjeve të 5 nëntorit. “Koreja e Veriut, kohët e fundit ka prezantuar një objekt të ri bërthamor ku bëhej pasurimi i uraniumit, për të tërhequr vëmendjen e Shteteve të Bashkuara dhe komunitetit ndërkombëtar në prag të zgjedhjeve presidenciale në SHBA, dhe ka të ngjarë që Koreja e Veriut të kryejë provokime shtesë si ato bërthamore apo teste dhe lëshime të raketave balistike ndërkontinentale”, tha Yoon. Shqetësimet për Korenë e Veriut janë rritur javët e fundit, me vendin që publikoi pamje në të cilat shihej lideri Kim Jong un teksa vizitonte një objekt të fshehtë të pasurimit të uraniumit, ku edhe përsëriti premtimin se do të ndërtojë më shumë armë bërthamore. Javën e kaluar, Kim Jong un po ashtu kërcënoi se do të shkatërronte Korenë e Jugut me armët e tij bërthamore, nëse do të provokohej. Shumë ekspertë të huaj thonë se Koreja e Veriut shpreson përfundimisht të përdorë një arsenal të shtuar bërthamor si levë për të fituar lëshime, si psh lehtësimi i sanksioneve, pasi të zgjidhet një president i ri i amerikan. Ata thonë se Kim Jong un ka të ngjarë të mendojë se një fitore e kandidatit republikan Donald Trump, të cilin ai e angazhoi në diplomacinë bërthamore në 2018-2019, do të rriste shanset për të marrë atë që dëshiron, më shumë sesa në rast të fitores së kandidates demokrate Kamala Harris. Në fushatë, Trump në fakt është mburrur për lidhjet e tij personale me Kim Jong unin, por Harris ka thënë se ajo nuk do të “rehatohet me tiranët dhe diktatorët si Kim Jong Un, të cilët bëjnë tifo për Trumpin”.